Áhugakönnun um samstarf í doktorsrannsóknum

Ljósmynd: Sindri Swan

Í kjölfar styrks sem fékkst úr Samstarfi háskólanna fyrir verkefnið “Þróun samstarfs háskóla og stofnana um þekkingaruppbyggingu í atvinnuvegi menningar og skapandi  á MA og doktorsstigi” vinnur Háskólinn á Bifröst nú að einum hluta þess verkefnis í samstarfi við Rannsóknasetur skapandi greina. Auk hans eru samstarfsaðilar Háskóli Íslands, Háskólinn á Akureyri, Hagstofa Íslands og Byggðastofnun. 

Liðurinn felur í sér að kortleggja þá aðila sem sæju hag sinn í því að eiga í samstarfi við rannsóknastofnun og doktorsnema í tengslum við doktorsrannsókn á sviði menningar og skapandi greina. Orðið fyrirtæki er notað hér eftir en nær til hvers konar skipulagsheildar, svo sem fyrirtækja, stofnana og félagasamtaka.

Í þeim tilgangi hefur verið gerð könnun sem ætluð er fyrirtækjum sem sjá hag sinn í samstarfi sem þessu. Samstarfið felur í sér að fyrirtækið kosti doktorsnám sem tengist menningu og skapandi greinum, í tilvikum þegar efni rannsóknarinnar tengist starfsemi eða hlutverki fyrirtækisins, án þess þó að vera hluti af daglegum verkefnum. Athugið að einnig væri möguleiki á að sækja um styrki fyrir verkefnið. Aðili innan rannsóknastofnunarinnar yrði leiðbeinandi og aðili innan fyrirtækisins tæki þátt í vinnunni, t.d. sem meðleiðbeinandi.

Engin skuldbinding felst í því að svara spurningunum heldur er tilgangurinn að fá hugmynd um þörfina og þau tækifæri sem standa doktorsnemum til boða. Í kjölfar úrvinnslu gæfist kostur á ítarlegra samtali. Könnunin verður opin út mánudaginn 29. september 2025.

Nánari upplýsingar og könnunina má nálgast HÉR.