Rannsóknasetur skapandi greina (RSG) efnir til málþings föstudaginn 8. ágúst 2025, sem er hluti af dagskrá Act Alone, leiklistarhátíðar þar sem einleikir eru í forgrunni. Hátíðin er haldin árlega á Suðureyri í Súgandafirði og fer fram dagana 6. - 9. ágúst. 

Á málþinginu fá gestir tækifæri á að hlýða á kynningar tveggja meistaranema sem hlutu styrk úr meistaranemasjóði RSG í ársbyrjun 2025. 

Helga Guðrún Jónasdóttir er meistaranemi í menningarstjórnun við Háskólann á Bifröst og mun segja frá verkefni sínu Er menning máttur? (vinnutitill) 

Lokaverkefni Helgu snýr að staðbundnum áhrifum á menningu og skapandi greinar sem rekja má til beins stuðnings stjórnvalda. Nýleg rannsókn hefur m.a. leitt í ljós að fyrir hverja krónu sem ríkið leggur til menningar og skapandi greina hér á landi skila sér þrjár krónur til baka í ríkiskassann (Ágúst Ólafur Ágústsson, 2024). Í lokaverkefninu verður leitað fanga við að þróa félagsefnahagslega mælikvarða fyrir opinberan stuðning á landshluta- og sveitarfélagagrunni, en tilraunir í þá veru hafa skilað heldur rýrum árangri m.a. sökum þess hversu illa grunngögn þjóðhagsreikninga hjá Hagstofu Íslands falla að slíkum staðbundnum greiningum. 

Börg Steinunn Gunnarsdóttir er meistaranemi í leikhús- og performansfræðum við Háskólann í Kaupmannahöfn og segir frá verkefni sínu Óbærilegur léttleiki leikhússins: Uppgangur alþýðuleiklistar á Íslandi. 

Þar rannsakar hún hvernig tiltekin leiksýning, Óbærilegur léttleiki knattspyrnunnar, náði að laða að nýjan áhorfendahóp í íslenskt leikhús og hvaða lærdóm megi draga af því fyrir framtíðarleikhús. Markmið verkefnisins er að greina velgengnisþætti sýningarinnar og skoða hvort og hvernig megi endurtaka þennan árangur með öðrum sýningum byggðum formgerð alþýðuleiklistar, með áherslu á menningarlega fjölbreytni og lýðræði. Ásamt því að bæta við þekkingarsvið íslenskra leikhúsfræða opnar verkefnið á möguleika til frekari þverfaglegra rannsókna en ýmislegt mætti yfirfæra á aðra kima menningar og skapandi greina.

Í kjölfar kynninganna fara fram pallborðsumræður þar sem fjallað verður um samfélagshátíðir, mikilvægi þeirra og áhrif á samfélagið.

Nánari dagskrá má nálgast á Facebook-síðu viðburðarins þaðan sem málþinginu verður streymt. Óþarfi er að skrá sig á viðburðinn. 

Takið daginn frá og sjáumst á Act Alone!

DAGSKRÁ 

Anna Hildur Hildibrandsdóttir stýrir málþinginu. 

15:01 Opnunarávarp 
Sigurður Pétursson, stjórnarmeðlimur og gjaldkeri Act Alone 

15:06 Ein stök eldræða 
Elfar Logi Hannesson, leikari og listrænn stjórnandi Act Alone 

15:16 Er menning máttur? (vinnutitill) 
Helga Guðrún Jónasdóttir, meistaranemi í menningarstjórnun við Háskólann á Bifröst 

15:31 Umræður 

15:41 Óbærilegur léttleiki leikhússins: Uppgangur alþýðuleiklistar á Íslandi 
Björg Steinunn Gunnarsdóttir, meistaranemi í leikhús- og performansfræðum við Háskólann í Kaupmannahöfn 

15:56 Umræður 

16:06 Pallborð - Samfélagsleg áhrif af hátíðum í landsbyggðum 
Stýrt af Önnu Sigríði Ólafsdóttur, verkefnastjóra hjá Vestfjarðarstofu. 

• Áskell Heiðar Ásgeirsson, lektor við Ferðamáladeild Háskólans á Hólum og annar eigenda Bræðslunnar. 

• Skúli Gautason, menningarfulltrúi Vestfjarða 

• Elfar Logi Hannesson, leikari og listrænn stjórnandi Act Alone 

• Sæunn Þorsteinsdóttir, listrænn ráðgjafi hátíðarinnar Við djúpið 

• Guðni Albert Einarsson, framkvæmdastjóri Klofnings, styrktaraðila Act Alone 

16:51 Lokaorð 
Fulltrúi menningarmálaráðherra 

17:01 Málþingsslit